जळगाव | द सिटीझन मिरर

मुंबई–नागपूर राष्ट्रीय महामार्गावरील रेल्वे उड्डाणपुलाच्या अत्यावश्यक दुरुस्तीच्या कामामुळे वाहतुकीत तात्पुरते, मात्र महत्त्वपूर्ण बदल करण्यात आले आहेत. नागरिकांची सुरक्षितता, वाहतुकीची सुरळीतता आणि अपघातांची शक्यता टाळण्यासाठी शहर वाहतूक शाखेने विशेष वाहतूक नियोजन लागू केले असून वाहनचालकांनी प्रशासनाने निश्चित केलेल्या पर्यायी मार्गांचा वापर करण्याचे आवाहन करण्यात आले आहे.

जळगाव शहर वाहतूक शाखेचे पोलीस निरीक्षक मोरेश्वर पेंदाम यांनी प्रसिद्धीस दिलेल्या पत्रकानुसार, भारतीय राष्ट्रीय महामार्ग प्राधिकरणाच्या (NHAI) विनंतीनुसार रेल्वे उड्डाणपुलाची दुरुस्ती सुरू करण्यात आली आहे. या कामाच्या कालावधीत संबंधित मार्गावरील जड व हलकी वाहने पर्यायी मार्गाने वळविण्यात येणार असून, वाहतूक पोलिसांनी जाहीर केलेल्या सूचनांचे काटेकोरपणे पालन करण्याचे आवाहन करण्यात आले आहे.रेल्वे उड्डाणपुलाच्या दुरुस्तीमुळे महामार्गावरील एका बाजूचा मार्ग बंद राहणार असल्याने विविध दिशेने जाणाऱ्या वाहनांसाठी स्वतंत्र पर्यायी मार्ग निश्चित करण्यात आले आहेत. वाहनचालकांनी वाहतूक पोलिसांच्या सूचनांचे पालन करून पर्यायी मार्गांचा वापर करावा, असे आवाहन करण्यात आले आहे.

वाहनांसाठी पर्यायी मार्ग
१) भुसावळ/नागपूरकडून धुळे/मुंबईकडे जाणारी वाहने :
भुसावळ – तरसोद फाटा – काळिका माता मंदिर – अंजिठा चौफुली – आकाशवाणी चौक – शिवकॉलनी – बांभोरी पूल – पाळधी मार्गे धुळे/मुंबईकडे वळविण्यात येणार आहेत.
२) मुंबई/धुळेकडून भुसावळ/नागपूरकडे जाणारी वाहने :
पाळधी – बांभोरी – शिवकॉलनी – आकाशवाणी चौक – अंजिठा चौफुली – काळिका माता मंदिर – तरसोद फाटा – भुसावळ मार्गे पुढे नागपूरकडे मार्गक्रमण करतील.
३) छत्रपती संभाजीनगरकडून नागपूरकडे जाणारी वाहने :
छत्रपती संभाजीनगर – पाचोरा – जामनेर – नांद्रा चौफुली – भुसावळ मार्गे नागपूरकडे वळविण्यात येतील.
४) नागपूरकडून छत्रपती संभाजीनगरकडे जाणारी वाहने :
नागपूर – भुसावळ – नांद्रा चौफुली – जामनेर – पाचोरा – छत्रपती संभाजीनगर मार्गाचा वापर करावा.
५) इंदूर/बडोदा/नंदुरबारकडून भुसावळ/नागपूरकडे जाणारी वाहने :
चोपडा – अडावद – यावल – भुसावळ मार्गे नागपूरकडे वळविण्यात येतील.
६) नागपूर/भुसावळकडून नंदुरबार/बडोदा/इंदूरकडे जाणारी वाहने :
भुसावळ – यावल – अडावद – चोपडा मार्गे पुढील प्रवास करावा.
पोलीस निरीक्षक मोरेश्वर पेंदाम यांनी नागरिकांना विनाकारण बंद मार्गावर प्रवेश न करण्याचे, वाहतूक पोलिसांच्या सूचनांचे पालन करण्याचे तसेच प्रवासापूर्वी पर्यायी मार्गांचा अवलंब करण्याचे आवाहन केले आहे. दुरुस्तीचे काम पूर्ण होईपर्यंत वाहनचालकांनी संयम राखून प्रशासनाला सहकार्य करावे, असेही त्यांनी नमूद केले आहे.